غياض دوت فور يو ليك منتدى المهندس احمد ابوغياض
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.


ان الله وملائكته يصلون على النبى يا ايها الذين امنو صلو عليه وسلمو تسليما**************** اللهم صلى وسلم وبارك عليك سيدى وحبيبى يا رسول الله
 
الرئيسيةالبوابةاليوميةأحدث الصورس .و .جبحـثالأعضاءالمجموعاتالتسجيلدخول

 

 كنت شيخه فأصبح شيخي!!!!!!!!!!! قصة حقيقية

اذهب الى الأسفل 
كاتب الموضوعرسالة
المهندس احمد
Admin
المهندس احمد


عدد المساهمات : 88
تاريخ التسجيل : 31/12/2010
العمر : 42

كنت شيخه فأصبح شيخي!!!!!!!!!!! قصة حقيقية Empty
مُساهمةموضوع: كنت شيخه فأصبح شيخي!!!!!!!!!!! قصة حقيقية   كنت شيخه فأصبح شيخي!!!!!!!!!!! قصة حقيقية Emptyالأحد أبريل 24, 2011 11:52 pm

السلام عليكم ورحمة الله وبركاته

كنت شيخه فأصبح شيخي!!!!!!!!!!! قصة حقيقية

قصة أكثر من رائعة وشيقة ومؤثرة جداً .. مقسمة لأربعة فصول ..

قصة حقيقة قام بروايتها صديق أبطال القصة وقام بنشرها علي منتدي ..

الطريق إلي الله

وقمت بنقلها لكم لما فيها من خير عظيم جداً ..

أتمني أن تقرأوها حتي النهاية ..

وأسألكم صالح الدعاء بظهر الغيب

يوسف وخالد يحبوا بعض في الله ,يوسف يعمل في بقالة والده , وخالد أخ يعمل إمام مسجد صغير ومحفظ للقرآن .

المشهد الأول( بقالة يوسف)

خالد: السلام عليكم كيف حالك يايوسف

يوسف: وعليكم السلام ورحمة الله وبركاته الحمد لله بخير كيف حالك انت ياخالد

خالد: والله في نعمة أخبار الشغل معاك ايه

يوسف:تعبان والله ياخالد حاسس اني في طاحونة ومش عارف اخرج منها

خالد: ليه بس

يوسف: بشتغل من العصر لقبل الفجر ولا عارف اصلي بخشوع ولا عارف اعمل اي حاجة حاسس اني ضايع خالص

خالد: لازم يايوسف تعمل ليك هدف علشان يبقا لحياتك معنى

يوسف: زي ايه مثلا

خالد: انك تحفظ القرآن مثلاً

يوسف : هههههههههههههه

خالد: بتضحك ليه

يوسف: ياعم هو انا فاكر انا أكلت ايه امبارح, تقولي احفظ القرآن,أنت مفكر كل الناس زيك ولا إيه

خالد: الله يهديك ربنا بيقول (ولقد يسرنا القرآن للذكر فهل من مدكر) , وبعدين أنت مفكرني حفظت القران بسهولة , دا أنا طلع عيني لما ختمت

يوسف وهو يحك ذقنه: بس انا ياخالد مش هنفع انت شايف شغلي عامل ازاي مش هنفع خالص

خالد: لا هتنفع ومين يعلم يمكن يجي اليوم وتبقا فيه الشيخ بتاعي في القرآن

يوسف:هههههههههههههه انت النهاردة مش طبيعي خالص!!! شيخك ايه بس دا أصغر ولد عندك في الكتّاب يبقا شيخي

خالد: مين عارف يايوسف مين عارف!!! المهم أنت ناوي ؟؟

يوسف: طبعاً ناوي بس بشرط انك تتابعني

خالد:أكيد أنا مش هسيبك بس لازم تعرف أن كل حاجة في أولها صعب يعني مش تمشي شوية وتقلي انا تعبت ومش قادر

يوسف: الله المستعان, ربنا يعينا بقا

خالد: اللهم آمين, ها هتبدأ امتى

يوسف: الأسبوع الجاي إن شاء الله

خالد: لا هتبدأ بكرة إن شاء الله

يوسف: دا انت صعب ياخالد

خالد: ياعم يوسف لازم تستغل انك نشيط الوقتي قبل ما تهبط تاني

يوسف: ماشي هبدأ من البقرة

خالد: لا هتبدأ من جزء عم علشان لو بدأت من البقرة هتقف لأنها صعبة عليك الوقتي

يوسف: طيب توكلنا على الله

خالد: بكرة بعد صلاة الفجر تصح عليا اللي أنت هتحفظه وتقعد تحفظ بعد الفجر

يوسف: ياعم أنا شغال طول الليل عايزني أحفظ بعد الفجر إزاي دا أنا ممكن أنام والمصحف يقع مني وأنا قاعد

خالد: مش احنا قلنا لازم هنتعب في الأول وبعدين أنت مفكر أنك هتبقا حافظ لكتاب الله بالساهل كدة لازم تتعب

يوسف: الله المستعان طيب ادعيلي بالله عليك

خالد: ربنا يوفقك وتبقا من أهل القرآن

يوسف: اللهم آمين

-----------------

انتهى الفصل الأول

الفصل الثاني (المسجد)

خالد: يوسف يوسف اصحا اصحا انت نمت

يوسف: يوسف مفزوعاً ايه في ايه , هو أنا فين

خالد ينظر باشفاق: أنت في المسجد يابني

يوسف: شوفت ياخالد أنا قايلك اني مستحيل أعرف أحفظ قرآن بسبب شغلي

خالد: قوم ياااااد وبطل كسل اتوضا وتعالى صلي الضحي واقعد كمل حفظ علشان هسمع لك

يوسف: طيب ياخويا مش عارف ليه ياخالد بحس ساعات كدة أنك مرات أبويا

خالد:مرات أبوك بكرة ان شاء الله لما تختم هتبوس ايدي وتقولي ربنا يكرمك ياخالد

يوسف: يارب يجي اليوم ده

خالد: إن شاء الله يلا قوم اتوضا وتعالى

يوسف:حاضر

يوسف راح اتوضا وصلى الضحى وقعد خلص الورد بتاعه بالعافية وجه يسمع

خالد: يلا سمع

يوسف بدأ في التسميع , وخالد كل شوية يرده , يوسف زهق فقاله ياعم أنا مش نافع دا مخي شبه علبة الكانز اللي عربية دايسة عليها

خالد: يابني سمع وبطل تهبط في نفسك شوف يايوسف أنا هقول لك حاجة , الحفظ ده زي لعب الحديد بالظبط, أول لما تيجي تلعب حديد بتشيل أوزان صغيرة وشوية شوية بتلاقيك دخلت في التقيل لان لياقتك بتعلا كل شوية الحفظ زي كدة بالظبط , حاجة تانية أن مخ الإنسان ممكن يحفظ كتب تغطي وجه الكرة الأرضية

يوسف : يالهوي كل ده أما الواحد مخه مصدي صحيح

خالد: علشان كدة لازم تصنفره ياعم الحاج

يوسف: حاضر نصنفره , بس ايه ياواد ياخالد المعلومات دي , دا أنا حاسس اني قاعد مع لاب توب

خالد: واد طييييييب والله لوريك دا انا يااااااااض الشيخ بتاعك انطق بدل ما أجيب الفلكة

يوسف:هههههههههههه , أبوس ايديك بلاش الفلكة

خالد:خلاص يبقا تحفظ وتلم نفسك أصل ورب الكعبة أظبطك

يوسف:طيب طيب هظبط نفسي وبدأ يسمع

انتهى الفصل الثاني

الفصل الثالث (بقالة يوسف)

طفل صغير: عاوز كيلو جبنة وب 2 جنيه بيض

يوسف وهو يضع المصحف من يده: حااااضر, بس برضه مكنش مركز كان بيكرر في الآية اللي كان واقف عليها

طراااااااااااااخ وقع كرتونة البيض كلها

أبوه كان قاعد امام المحل دخل على الصوت: دخل شااااااف المنظر

يوسف (بيكلم نفسه): ياخبر أبيييييييييييييييض استعد للصورايخ يايوسف

أبوه بصوت جهوري : انت يااااااااااااااااااد مبتشوفش شغلك كويس ليه , عاجبك الخساير دي, يكونش مفكر نفسك الشيخ الحصري ولا ايه

يوسف وهو يقبل يد أبيه: معلش يابا مكانش قصدي والله , وبعدين انا لما احفظ القرآن أنت هتلبس في الجنة تاج الوقار , والتاج ده بس للي أولاده حافظين القرآن

أبوه متعجباً : بعد ما شاب ودوه الكتاب , دا أنا غلبت معاك وأنت صغير يايوسف وانت كنت بتهرب من الكتّاب , وكنت بتشتم الشيخ بتاعك, عايز الوقتي وانت عندك 25 سنة تحفظ القرآن!!!!!!!

يوسف وهو منكس رأسه في الأرض: هو أنت لازم كل شوية تفكرني بالموضوع ده , أنا اتغيرت يابا ونفسي أنك تشجعني وتدعيلي علشان ربنا يكرمني

أبوه: حاضر يافالح هدعيلك بس أهم حاجة تشوف شغلك وتبطل

شغل الدراويش اللي أنت فيه ده, قوم نضف اللي البيض اللي أنت كسرته ده

يوسف: حااااضر

كان هذا الموقف بعد كلام خالد ليوسف عن القرآن ب 4 شهور ,

خالد كان اشترى ليوسف مصحف التجويد صغير الحجم علشان

يبقا معاه في كل مكان , وكان اتفقوا ان يوسف يحفظ كل يوم وجه من الصفحة

(المسجد )

خالد بيقرأ علشان يوسف يقرأ بعده

يوسف سرحان خالص ومش مركز بالمرة

خالد: مالك يايوسف في ايه انت النهاردة مش معايا خالص

يوسف : حاسس اني طالع جبل وكل الناس بتشدني لتحت

خالد: ليه بس

يوسف: أبويا كل شوية يكسر في مجدافي ويقول لي ابقا قابلني لو نفعت

خالد: ههههههههه , انت كسرت ايه تاني امبارح

يوسف: ههههههههههههه, كرتونة بيض

خالد: يابني صحصح شوية عنده حق برضه لما انت كل شوية

بتكسر حاجة في المحل بسبب انك مش مركز يعني خساير على الفاضي

يوسف: يعني أعمل ايه يعني , الوجه بتاع كل يوم لازم اكرره كتير علشان احفظ

خالد : أيوة بس ركز في شغلك برضه, تعرف لما أبوك هيشوفك

مركز في شغلك و مهتم بالمصلحة بتاعته هيقول ياريت كل

ولادي زي يوسف وهيدعليك ان ربنا يزيدك من القرآن اللي خلاك

تبره وتهتم بشغلك, يعني في المرحلة دي مش عايزين مشاكل

احنا عندنا هدف وعايزين نركز فيه مش عايزين حد يشغلنا عن هدفنا

يوسف: والله عندك حق

خالد: طيب انت بتحفظ بقالك كام شهر

يوسف: 4 شهور الحمد لله خلصت جزء الشورى امبارح وهدخل في سورة فصلت النهاردة

خالد: ممتاز , أنت كدة حفظت خمس القرآن يعني قطعت خمس الطريق احساسك ايه الوقتي

يوسف: احساسي اني كل يوم بيبقا عند ابن جديد لان كل صفحة بحفظها هي ولد من اولادي, بس أنا فرحان أوي اني وصلت لكدة

خالد: كويس انك تفرح بس اوعا تكسل لسة في مشوار طويل لازم نمشيه

يوسف : الله يبارك فيك ياخالد ويجزيك عني خير

خالد : اللهم آمين , يلا اقرأ علشان تصح ورد النهاردة

نسيبهم احنا بيقرأوا ونمشي احنا لحد ما نقابلهم

في الفصل الرابع والآخير

الفصل الرابع (المسجد بعد 8 شهور من أول الحفظ)

يوسف: تعرف ياخالد أنا حاسس أني اتولدت من 8 شهور بس

خالد: امال انت مفكر ايه , لما انت قولت لي انك مش عايش , عرفت أن حلك انك تحفظ القرآن, يابني أنت لسة مشوفتش بركات القرآن ده في حياتك

يوسف: لا والله شوفت, أبويا مبسوط مني على الآخر وعايز يجوزني كمان

خالد: سيدي ياسيدي على الحلاوة, ماشية معاك ياعم

يوسف: ههههههههه الحمد لله دا من كرم ربنا عليا, يااااااااااه مين كان يصدق ان يوسف يحفظ 12 جزء من القرآن في 8 شهور دا أبويا نفسه مش مصدق

خالد: تعرف يايوسف أنا معجب بهمتك أوي, دا أنت ياما نمت وانت بتحفظ , وياما كسرت بيض هههههه, وياما اخدت دش بارد من أبوك , بس أكتر حاجة عجبتني انك استحملت مع كل المشاكل دي

يوسف: أنا نفسي مستغرب من كدة لكن دا من فضل ربنا ومتنساش برضه انك وقفت جنبي كتير

خالد: ياعم الله يبارك فيك أنا أمنية حياتي أن أكون سبب في حفظ الناس كلهم للقرآن

يوسف : ربنا يحقق لك اللي نفسك فيه

خالد: ها نتكلم جد شوية بقا, اخبار حفظك ايه الوقتي

يوسف: الحمد لله , المصحف مش بيفارق ايدي, حتى وانا راكب العجلة بسوق بايد والمصحف في ايد, دا أنا مرة كانت عربية هتخبطني ههههههه, وكنت عايز أقولك على حاجة

خالد: قوووووووول ياكبير

يوسف: عايز أزود الحفظ من وجه إلى وجهين يعني صفحة وش وضهر , وجه واحد مش بياخد غلوة مني الوقتي

خالد: ياسلام شوفت مش انا قايلك زي لعب الحديد طيب ياحاج هنزود لوجهين

بعد الجلسة دي بشهر خالد راح ليوسف المحل بتاعهم

خالد : يوسف عايز بسرعة في حاجة مهمة

يوسف وهو قلقان: خير قلقتني ياخالد

خالد: لا مفيش حاجة بس في موضوع مهم عايز فيه

يوسف : طيب اقابلك بعد صلاة العصر في المسجد

خالد: طيب منتظرك

بعد صلاة العصر

يوسف : ايه ياعم في ايه قلقتني

خالد: يابني هقولك, بص ياسيدي, في فرصة الوقتي انك تدرس علم القرآن بحق وحقيق

يوسف: ازاي

خالد: معهد القراءات فتح الباب للتسجيل للسنة الجديدة

يوسف: ههههههههههه, قراءات مش لما أختم الأول وبعدين أتقن حفص أبقا أشوف القراءات

خالد: يابني اصبر لما أشرح لك

يوسف: قول ياعم الحاج

خالد: المعهد مش مشترط انك تكون ختمت, انت حفظت كام الوقتي

يوسف: 15 جزء

خالد: ممتاز, أن أعرف شباب دخلوا وهم معاهم 10 وختموا في المعهد

يوسف: بس ياخالد انا كنت نسيت موضوع الدراسة والكلام ده وبعدين الشغل

خالد: الدراسة هتكون في حاجة بتحبها القرآن يااااااااد وبعدين لما هتشوف حلاوة المعهد مش هتفرط فيه

يوسف : طيب سيبني أفكر

خالد : مفيش وقت التسجيل هيقفل بعد بكرة , جهز ورقك علشان نقدم بكرة ان شاء الله

يوسف: الله المستعان يارب يسر الأمور

خالد: اللهم آمين

يوسف : طيب أنت جهزت ورقك ولا لا

خالد: ما هو دا الموضوع التاني اللي أنا عايزك فيه

يوسف: خير

خالد: أنا بجهز ورقي علشان مسافر السعودية

يوسف وهو حزين: ازاي يابني زعلتني والله

خالد: انت شايف وضعي عامل ازاي وبعدين لازم اشتغل في تخصصي بقا

يوسف: والله ياخالد أنت هتفرق معايا أوي , ومش عارف هكمل الحفظ ازاي من غيرك

خالد: لا اوعا تهد كل اللي احنا عملناه علشاني , ان شاء الله تتقبل في المعهد وتلاقي هناك صحبة حلوة ومشايخ تقال يبقوا أحسن مني ميلون مرة, وبعدين هبقا اتصل بيك في التليفون اطمن عليك

يوسف وقد دمعت عيناه وهو يعانقه: مفيش حد أحسن منك ياخالد

خالد وقد تأثر بالموقف: ربنا يبارك فيك يايوسف بس لازم توعدني انك تكمل الطريق للاخر

يوسف وهو يمسح دموعه: إن شاء الله هتسمع عني ما يسرك

خالد: اللهم آمين , يلا جهز ورقك علشان نروح بكرة ان شاء الله

يوسف: حااااااضر

في اليوم التالي ذهبا سوياً إلى المعهد وتم تسجيل يوسف , و تم

تحديد إمتحان القبول بعد أسبوع مع المقابلة الشخصية

طوال هذا الأسبوع اجتهد خالد مع يوسف وراجع له كل الذي

حفظه كام لو لسة فاكرين ؟؟؟ أيوة صح 15 جزء

المهم امتحن يوسف وعمل المقابلة الشخصية وبعدها ب 10 أيام

يوسف: خالد بارك لي

خالد: بشرني

يوسف: الحمد لله اتقبلت في المعهد ودا كله بفضل الله ثم بسببك يا أعز أخ وصديق

خالد: اللهم لك الحمد , كدة بقا أسافر وأنا مطمن عليك

يوسف بحزن: أنت مسافر امتى

خالد: السبت القادم ان شاء الله

يوسف: توصل بالسلامة ياحبيبي, بس اوعا تنساني ياخالد

خالد: انساك ازاااااي ياااااااااااااااد دا انت أكتر من أخ , بس
ادعيلي

يوسف: يعلم الله كم أدعو لك

خالد: الله المستعان

سافر خالد , ودخل يوسف المعهد وتعرف على إخوة مجتهدين في القرآن, ووجد ضالته في المعهد, وطوال هذه الفترة كان خالد دائم السؤال عليه والتعرف على أخباره

وفي يوم

ترررن تررررررررن جرس التليفون

خالد: السلام عليكم ازيك يايوسف

يوسف بفرح: وعليكم السلام حبيب قلبي كنت لسة هبعت لك رسالة الوقتي

خالد: طمني عليك اخبارك ايه واخبار القرآن والمعهد معاك إيه

يوسف : ما هو ده موضوع الرسالة ياغالي

خالد: بشرني

يوسف: أنا ختمت القرآن

خالد: الله أكبر ولله الحمد , ما شاء الله لا دا لازم عزومة فيها دي

يوسف: طبعاً بس لما تنزل أجازة, بس اصبر على رزقك لسة في أخبار حلوة

خالد: قوووووووووووووول ياعسل دا أنت النهاردة فرحتني والله

يوسف: أنا طلعت التاني على المعهد

خالد: ما شاء الله والله أنا مش عارف أقولك إيه ألف مبروك ياغالي

يوسف: الله يبارك فيك ياحبيبي , خد التقيل بقا

خالد: ايه ياواد الحلاوة دي كله مرة واحدة كدة, دي أحلى مكالمة من أول ما سافرت

يوسف:هههههههههه, أنا أخدت إجازة بحفص على ايد شيخ كبير في المعهد, وإن شاء الله أنا رايح عالية قراءات السنة الجاية وهاخد الشاطبية بتاعت القراءات السبع

خالد: ما شاء الله , وكنت بتقول مش هتنفع هههههههه ربنا يثبتك يايوسف والله انت مش عارف أنا سعيد اد إيه

يوسف: عارف ياخالد انك اكتر واحد هتفرح لي , دي زرعتك وانت رعيتها ودي النتيجة

خالد: الحمد لله رب العالمين

انتهت المكالمة وخالد و يوسف في قمة السعادة, بعدها بشهرين

نزل خالد أجازة في الصيف , وطبعاً مش هقدر أوصف لقائهم مع

بعض كان عامل إزاي علشان مش عايز أبكي, المهم نسيت

أقولكم على حاجة مهمة, أن بعد ما خالد سافر يوسف مسك

المسجد مكانه

لا إله إلا الله

دي آخر جملة في إقامة صلاة العشاء

يوسف بيقدم خالد للإمامة فقال خالد والله أنا أستحي أن أصلي

وأنت خلفي , يوسف إزاي دا أنت شيخي

فتقدم خالد للصلاة وهو يقول في نفسه

(سبحان الله اللهم لك الحمد كنت شيخه فأصبح شيخي)

نسيبهم بقا يصلوا العشاء ونمشي احنا بقا

وقبل ما نمشي نقول

تمت بحمد الله

جزاكم الله خيراً
الرجوع الى أعلى الصفحة اذهب الى الأسفل
https://ghaiad.yoo7.com
 
كنت شيخه فأصبح شيخي!!!!!!!!!!! قصة حقيقية
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
غياض دوت فور يو ليك منتدى المهندس احمد ابوغياض :: المنتديات الاسلاميه :: منتدى الاسلاميات العامه-
انتقل الى: